في يوم من الأيام جالى إتصال من أحد العملاء طالب منى #إستشارة وأننا نتقابل، طبعا رحبت جدآ وحددنا موعد المقابلة وقد كان وصلت عنده مقر الشركة، وقعدنا فى المكتب وتعرفنا أكثر على بعض وعلى #طبيعة_البيزنس الخاص به.
وهنا قالى أن المشكلة إللى بتواجه إنه لازم يعمل كل حاجه بنفسه، ولو هو مش موجود ممكن الشغل كله يقف.....لأن مفيش حد يثق فيه أو يحل مكانه، لدرجة إنه ممكن يتكلم فى التليفون بالساعات مع عملاء وينسي نفسه، والموضوع ده فعليآ بقي بيشكل #أعباء_كتير عليه وإنه جرب يحط ثقته فى ناس كتير ولكن النتائج كانت غير مرضية بالنسبة له.
وبعد ما سمعت منه التفاصيل كاملة وقعدنا اكثر من 5 ساعات جمعت فيهم معلومات ومعطيات كتير عنه وعن طبيعة العمل الخاص به وعن السيستم إللى هو ماشي عليه فى #ادارة_البيزنس وعن الأشخاص إللى شغالين معاه ومستوياتهم الوظيفية ومهام عملهم.
رديت عليه وقلت له أتمنى إن حضرتك تتقبل الرد بصدر رحب خلينا متفقين إن الحالة دى فى ناس كتير بتعاني منها مش أنت لوحدك ولكن علشان نوصل للحل لازم نعرف إن الحالة دى إحنا المتسببين فيها مش أى حد تانى.
ليه.......لأننا بنمارس أدوار مش أدورنا فى الأساس، ومن كتر ما إحنا بنعمل حاجات مش المفترض إننا إللى نقوم بها بنوصل لمرحلة
إسمها #الإحتراق_النفسي_والوظيفي ومع الأسف المرحلة دي كفيلة أنها تهد كل إللى اتبنى فى لحظة واحدة.
ده طبعآ غير أن الأسلوب ده فى إدارة أى بيزنس بيخلق جيل من الموظفين لا يتحمل المسئولية وبيتحول عملهم إلى مجرد أعمال روتينية ليس فيها أى إبتكار أو إبداع.
وهنا رد قالي طيب أعمل إيه لان فعليآ شكلى كده بدأت أدخل فى المرحلة دى وحاسس إني ضايع ومعنديش وقت أتنفس.
أولا حضرتك لازم تعرف إنك لو جايب ناس علشان تقولهم يعملوا إيه وما يعملوش إيه يبقي حضرتك محتاج فريق سكرتارية مش ناس تدير وتديك مخرجات ونتائج واضحة.
علشان كده لازم تدي الناس إللى عندك مساحة يقدروا يشتغلوا فيها علشان ما يفقدوا ثقتهم فى نفسهم ويمشوا معاك بمبدأ طالما هو عايز كده يبقي ملناش دعوة.
وخلى بالك من الواضح أن فى عندك ناس كتير ماشية بالمبدأ ده ولكن.....هما بقوا كده علشان أنت عودتهم على كده يبقي أول حاجه لازم تغير #طريقة_تفكيرك.
ثانيا فى حاجه إسمها #تفويض_الصلاحيات ولو عندنا موظفين مش عندهم صلاحيات واضحة ومحددة ومكتوبة ومعروف إيه المطلوب منهم بالظبط من المؤكد برضوا المخرجات هتكون مش مظبوطة علشان كده لازم تمشي بمبدأ #لا_تعطينى_سمكة_ولكن_عملني_كيف_اصطاد
علشان كده لازم كل واحد يكون عارف دوره بالظبط وعارف ازاى يؤدي الدور ده بأفضل طريقة، وهنا يجي دور التدريب المستمر ورفع كفاءة الموظفين بإستمرار.
ثالثا بلاش تقيس كل حاجه على نفس أدائك ده طبعآ لو عايز فعلا إنك تفوض صلاحيات لأن من المؤكد مش هتلاقي حد يعمل إللى أنت بتعمله كوبي وبيست ولا بنفس الجودة والكفاءة بتاعتك.
وده لأنك اتعلمت ده فى سنين مش فى يوم وليلة، ولأن بمنتهى البساطة فى حاجه إسمها #الفروق_الفردية واكيد طريقة ادائك تختلف عن طريقة أداء أى شخص آخر علشان كده #بلاش_ترفع_سقف_توقعاتك اكتر من اللازم وبلاش تخنق نفسك زيادة عن اللازم بالبلدي كده غمض عين وفتح عين لحد ما تتدرج فى تدريب وتعليم الناس إللى أنت بتعمله خلى فى دايمآ حد أدني ترضي به لفترة معينة وخليك فاكر أن #السعي_للكمال ممكن يكون سبب رئيسي فى عدم تقدمنا.
رابعا أنت كمان محتاج #تدير_أولوياتك_ووقتك وتعرف مهمامك صح ومسئولياتك.....لأن لو فضلت ماشي بنفس الأسلوب وطريقة التفكير إللى أنت ماشي بها مع الأسف هتكون بتحرق نفسك نفسيآ ووظيفيآ زى ما قلت لحضرتك، وده على المدي البعيد هيخليك تكره إللى بتعمله وهتبقي حاسس نفسك دايمآ مخنوق متضايق، وطبعا كل ده على حساب أهل بيتك وصحتك.
علشان كده أنت محتاج تقعد مع حد متخصص وترتب العمل وتحط #وصف_وظيفي واضح لك وللناس إللى معاك علشان كل واحد يبقي عارف دوره صح وما ميبقاش هدفنا أننا #نجيب_لبن_العصفور ولازم تشتغل علي #إعادة_هيكلة_البيزنس على أسس سليمة.
خامسا حط الرجل المناسب فى المكان المناسب ودى نقطة مهمة جدآ لازم تديها وقتها أكتشف الناس إللى عندك صح وأعرف إزاى تستفيد من كل واحد فى مكانه الصحيح أعتقد إن النقطة دى كمان محتاجه منك مراجعة واهتمام أكتر من اهتمامك بحاجات تانية.
وفى نهاية اللقاء الممتع مع صديقي العزيز اخد قرار بإعادة هيكلة البيزنس وعمل وصف وظيفي لكل الوظائف إللى عنده
واخد قرار بتعيين #مدير_تنفيذي للشركة متخصص فى مجال العمل وتأسيس لجنة متخصصة هدفها العمل على إعادة ترتيب الأوراق ووضع الرجل المناسب فى المكان المناسب بحيث أن كل واحد يكون عارف دوره والمطلوب منه بالظبط وحطينا وقت محدد لتنفيذ المطلوب بحيث يكون بشكل تدريجي وبحسب الأولويات بما يتوافق مع رؤية ورسالة الشركة وأهدافها.
وفى الختام
" من واقع خبرتك ما هي النصيحة إللى ممكن تضيفها فى هذه الحالة ؟
بإنتظار تعليقاتكم ومشاركاتكم التى أتشرف بها
تحياتى
كريم محسن
=================================================
احنا موجودين في كل المنصات عشان نوصلكم المعلومة اللي تفديكم في شغلكم او الابتسامة اللي بتساعدنا في مواجهة الظروف الصعبة او يارب يجعلنا سبب في انك تلاقي وظيفة
مستنينكم
***********************
***********************
0 تعليقات